ښځه یوازي مور، خور و لور نده!/ غوټۍ سپیڅلې

ګرانې او مسلمانې خورې !
السلام علیکم ورحمة الله وبرکاته
عزتمندې خورې! ستا د دې آرمان او هیلې زیات درناوی کوم چې د ښځو لپاره درناوی، کار او په ټولنه کې بوختیا غواړې. کله دې له ځانه سره داهم ویلي که نه چې په کوم شکل او د کومو شرایطو او حالاتو په بهیر او شتون کې باید دا ستا هیلي او هرڅه یوې مسلمانې خورته په لاس ورکړل شي؟
غواړم څو ټکي درته د خپل ژوند او اسلامي عقیدې څخه درته په ډیر زیات درناوي ډالۍ کړم:
• تا د ښځو لپاره خودمختاري او خپلواکي غوښتې ده او بیادې دا ویلي دي چې (په بنیادي اړتیاوو پوره کولو کې یوبل ته محتاج نه وي) لومړی خو خپلواکي او احتیاج له یوبل سره متضاد نه دي. بل الله تعالی د میرمنې نفقه او مادي اړتیاوې په نارینه باندې فرض کړې دي. پدې کې کومه داسې ورانه چاره ده چې ته یې دومره غوصه کړې یې چې د الله تعالی د صریح فرمان په وړاندې خپل پوچ او متعصب فکرد نوې متمدنې جامعې د ژوند انځور په شان ګورې؟
• زه دخپل ۴۰ کلن عمر په اوږدو کې، د داسې میرمنو چې د وزارت له چوکۍ نیولې بیا تر ښکته هغه مناصبو پورې چې ستا په فکر به هم نه راځي مخامخ شوی یم او د یوه خورا ښه پلټونکی بنی آدم په څیر مې د هغوی حالت او ژوند لیدلی او بیا مې د الله تعالی له قرآنی لارښوونو سره پرتله کړی او په خورا خپلواکۍ او بې پرېتوب مې ورته پایله را ایستلې ده، چې هر ځل د انسان دخپلو غوښتنو او تصوراتو دنیاګۍ خورا غلطه او دالله تعالی د لارښوونو او هدایتونو لاره تل ښکلې او په دنیا او آخرت کې د عزت لاره وه او ده.
• که ته دې ته عزت او احترام وایې چې: د پلار، ورور، مېړه او نورو نارینوو د سمو پریکړو په وړاندې په غربي دیموکراسۍ باندې ولاړ دریځ ولرې، هرډول چې دې زړه شي له کوره راووځې، له هرچا سره چې دې خوښه شي هرچیرته سفر وکړې نو بیا خو د دغه شان کړنو عملي بیلګې د غیرمسلمانو ټولنو او یا د تش په نامه اسلامي جاهلو میرمنو په ژوندانه کې یې وګوره او بیا په ټوله بې طرفۍ ووایه چې هغسې ژوند غواړې؟
• دا احصائیه د احوال او نفوسو د ثبت کومې ادارې تاته په لاس درکړې ده چې مونږ ټولو د خپل نفوس نیمایي برخه په کورونو کې بندیانې کړې دي؟ که یوازې په ډوډۍ پخولو، کور پاکولو، جامو وینځلو او ماشومانو راوړلو ته خفه وې نو ته او خدای زه خو همدا نن دې تیا ر او چمتو یم چې همدا اوس مې له میرمنې دا بار لرې کړم او بس دا دې بیا نره شي او هغه دژوند د ټولو کړاوونو د پېټی نیمایې خو دې بیا را سره نیم کړي چې همدا اوس زما په اوږو دی؟
• زه له دې هیڅکله نه یم منکر چې یوه مسلمانه میرمن او خور ښه ښوونکې، ښه ډاکټره، ښه پیلوټه، ښه مشره او… نشي کیدای، بلکې له تا سره خورې یوازې پدې کې یوخوله نه یم چې دغه ټولو د اجتماعي ژوند منصوبونه او دنیوې لاسته راوړنې د یوې مسلمانې خور په اخروي او ابدي لاسته راوړنو مه مخکې کوه او اسلامی شرایطو او محدودیتونو له پامه غورځولو ته یې مه رابوله او د غربي او شرقي نړۍ په شان یې د لوبو لپاره د وږو لیوانو لاسته مه ورکوه!
په هرحال بیاهم وایم خورې الله تعالی دې زمونږ د ټولو ښځو هغه څه په برخه کړي چې دا دنیا او آخرت یې پرې روښانه او زمونږ سره ښاد وي وما ذلک علی الله بعزیز
والسلام علیکم ورحمة الله وبرکاته
ستاسو مسلمان ورور
شریف
کابل – افغانستان