کډوال بیا کډوالۍ ته مه اړباسئ !!/ محمد ابراهیم سپېڅلی

په دې وروستیو کي د پاکستان حکومت په هغه خاوره کي له افغان مهاجرینو غوښتي، چی د يوې میاشتي په اوږدو کي له پښتونخوا ایالت څخه افغانستان ته کډي بار کړي.

دا لومړی ځل نه دی، چی افغان مهاجرینو ته کوربانه هیوادونه د وتلو اخطاریه نېټې ټاکي، تردې مخکي هم پاکستان داډول له غروره ډکی پرېکړی کړي او ایران خو بیا د افغانانو په اعدامولوهم شرم نه دی کړی.

هر وخت، چی ګاونډیان غواړي پر افغان دولت فشار زیات کړي، نو د نورو غوښتنو ترڅنګ د دوی په هیوادونو کي میشتو افغانانو ته د کډي بارولو امر وکړي.

دا ښه خبره ده، چی افغانان خپل ټاټوبي ته راستانه سی،خو له بده مرغه زموږ د یوشمیر غیري مسلکي، ځان غوښتونکو او تر څټه په فساد کي د ککړو چارواکو د بېغورۍ له امله افغان کډوالوته په خپل هیواد کي لاتراوسه د اوسیدو زمینه چمتونه ده.

دامنو، چي په تېرو څوارلس کالو کي د نړېوالي ټولني لخوا بې حسابه ډالری مرستې وسوې، لیکن له بده مرغه دا مرستي د یو څو شېربریتو(!)شخصي بانکي اکاونټونو ته ولاړې او مستحق افغانان لا تراوسه پیاز په ګنډه په ډوډۍ پسی سرګردان ګرځي.

که چیري په هیواد کي د وزګارتیا،ناامنۍ او نورو ستونزو ترڅنګ د پاکستان په پښتونخوا ایالت کي پراته افغانان هم خپل هیواد را کډه سی، نو دا به د جګړه ځپلي افغانستان پر سر یو بل اقتصادي ګذار وي، ځکه دا دومره زیات کسان سرپنا، کار، امنیت او د ژوند نورو چارو ته اړتیا لري، افغان دولت اړ دی، چی په دې دې ترینګلي تپل سوي حالت کي د راستنیدونکو کډوالو دروند پېټی پورته کولو ته هم ملا وتړي، خو زما په ګومان اوس يې د پورته کولو توان په مټو کي نه سته.

که پاکستانیان په ګرېوان کي سرکښته کړي، نو په دې پوه دي او نور به هم وپوهیږي، چی هلته میشت افغانانو له دوی سره د خپلو ورڼو په ډول ژوند کړی، د دوی شاړي مځکي او له ښارونو لېري سیمي يې د پنډغالو ( کیمپونو) په نامه ابادي کړي، پانګه اچوونه يې کړې او بالاخره د دوی هر غم او درد ته په جګو سترګو ولاړ دي.

داخبره، لکه لمر روښانه ده،چی افغانانو له جګړو او ناامنیو له امله خپل ګران هیواد پرې ایښی دی، نو پر همدې بنسټ يط هیڅکله شر نه خوښیږي او نه د شر خلک دي، که نور هم رښتیا سره ووایو، د افغان مهاجرینو دسر په صدقه، پانګه اچونه او مالیه ورکولو پاکستانګی، په پاکستان بدل سوی دی.

افسوس! چی هر وخت پاکستان له خپله لاسه په یوه تلکه بند سوی، نو د خپلي لمني تور داغ يې د افغانانو په وینو، ځورونه او دوی ته په بېلا بیلو ګواښونو پاک کړی دی، خو افغانان پوهیږو، چی ستونزه چیري؟

که پر واقیعت سترګي پټي نه کړو د پاکستان استخباراتي اداره ښه خبره ده، چی پېښور کي پر پوځي ښوونځي وسله وال بریدونه چیري او چا پلان کړي وو؟ په دې هم د دوی ښه سرخلاص دی، چی داسی منظم وسله وال بریدونه د افغانانو کار نه دی او نه هم په دې کي افغان مهاجر لاس لري، ځکه د تیرو نږدې څلورو لسیزو راهیسی د افغانانو په کورونو کي خپله ددغسی تپل سویو بریدونو له امله د غم ټغرهوار دی.

افغانان تراوسه نه دي پرېښوول سوي، چی ان له خپل کور څخه د غم بلا وباسی، نو څنګه به وکولای سی، چی د ګاونډیو کورونو ته د غم تور دېګ ننباسی؟

ښه خبره داده، چی پاکستاني چارواکي خپله پرېکړه بیرته واخلي او د بشري حقونو سره سم هلته میشت افغانان په یو او بل نامه ونه ځوروي، ځکه د دوی یاده پرېکړه د افغان کډوالو ترڅنګ پاکستان ته هم اقتصادی ضربه ده.

افغان چارواکو ته ښايي، چي په دې اړه له خپل مسلمان او ګاونډي ورور(!) پاکستان سره ډیپلوماټیکي خبري وکړي، ترڅو په سلهاوو زره بې کوره او بې اوره افغان مهاجرین په شنه یخ کي یوځل بیا بې کوره او بې اوره نه سی، ځکه د هجرت پرمهال هري کورنۍ د ځان لپاره یوه اندازه کار بار سم کړی، نواوس چی بیا د هیواد په دې ترینګلو حالاتو د اولادونو لپاره یوه کوچنۍ سرپنا او کار وبار سموي ډېر وخت غواړي، چی داد هر راستانه سوي کډوال له توان وتلی کار دی.