یو مفعول په انګلستان کې له یوه پخواني طالب سره په اطاق کې برابر شو

تاند – یو مفعول افغان پناه غوښتونکی په انګلستان کې د طالبانو د حکومت له یوه پخواني غړي سره چې هغه هم په یاد هېواد کې پناه غواړي، برابر شوی دی.

دا خبره د انګلستان مشهورې ورځپاڼې انډیپنډنټ په خپله نننۍ ګڼه کې را اخیستې ده او اندېښنه یې ښودلې ده چې یاد شوی هلک له باران نه تښتېده چې ترناوې لاندې یې شپه شوه.

ویل کیږي چې هلک له ایران څخه انګلستان ته تللی دی.

انډیپنډنټ ورځپاڼه وایي چې دغه هلک ته د کډوالۍ د سیستم یوې قراردادي موسسې چې پناه غوښتونکیو ته د اطاقونو او نورو اسانتیاوو د برابرولو چارې سمبالوي له پخواني طالب سره په یوه اطاق کې ځای ورکړی دی. طالبانو د خپلې واکمنۍ پر وخت همجنس بازانو ته د سزا ورکولو له پاره سخت قوانین وضع کړي ول.‌

د انګلستان په پارلمان کې د کارګر ګوند یوه همجنس باز غړي سټیون ډوټي دغه کار ټکان ورکوونکی وګاڼه او ویې ویل چې د یوه همجنس باز په توګه به دا زما له پاره وحشتناکه وي چې زه دې له داسې یو چا سره په یوه اطاق کې واوسېږم چې زه د هغه له ډاره خپل وطن پرېږدم یا احتمال وي چې ما ته دې له هغه څخه تکلیف را ورسېږي.‌

د میډلزبرا سیمې یوه پارلماني وکیل مک ډونلډ وویل چې ما له هغه هلک سره پخپله ولیدل، انډیوالانو له هغه سره خپل ملاتړ وړاندې کړ او کور ته یې بوتلو، اوهغه په دې راضي نه وو چې بېرته هغه ځای ته ورستون شي.‌

ویل کیږي چې‌،‌ ګڼ شمېر ایرانیان چې په غربي نړۍ کې په اسانه پناه نه ورکول کیږي دغوهېوادونو ته په رسېدلو سره د پناه د ترلاسه کولو له پاره یا عیسویت ته اوړي او یا هم په دې پلمه چې همجنس بازان دي د پناه غوښتنه کوي او له څو کلونو راهیسې دې ته ورته چاره د افغانستان هزاره وګړي هم کوي چې یا عیسویت ته اوړي او یا هم ادعا کوي چې همجنس بازان دي او دوی هم تر ډېره په خپل چال کې بریالي شوي دي.‌