جلال کوټ د جمعې په ورځ د نارنج ګل د دوديزې مېلې او مشاعرې کوربه و،چې د ګڼ شمېر هېوادوالو سربېره په کې د کوزې پښتونخوا يوشمېر ليکوالو او شاعرانو هم برخه اخيستې وه.
پيل له مېلې وشو،چې پرانسته يې د ننګرهار والي او نورو وربلل شوو فرهنګيانو له لوري وشوه.
د نارنج ګل په دغه دوديزه مېله کې د بېلابېلو کورنيو توکو؛ نندارې ته د ايښودلو ترڅنګ د کوچيانو کېږدۍ او اوښ هغه څه وو،چې د مېلې بڼه يې لاښکلې کړه او نندارچيان يې خپلې مخينې ته بوتلل.
ننګرهار والي سليم خان کندوزی وايې: د مېلې له جوړيدو يې موخه هېوادوالو په خاصه توګه ننګرهاريانو ته د تفريح د کولو زمينې برابرول وو.
نوموړی زياتوي: د هېوادوالو پرشونډو د مسکا خپريدل او هغوی ته د خوشحاله شېبو برابريدل يې لويه ارزو ده.
په همدې حال کې د ننګرهار اطلاعاتو او کلتور رئيس اورنګ صميم وويل: هر قوم د هغوی د ارزښتونو له امله ژوندی دی،نو په کارده،چې خپل ارزښتونه وپالو.
په تېرو څوکلونو کې ،چې د نارنج ګل مېلې او مشاعرې په جلال اباد شاهي ماڼۍ کې ترسره کېدې د ډېرو فرهنګيانو او ليکوالو غبرګونونه یې هم له ځانه سره لرل، خو دا ځل د ننګرهار والي له سانسو پرته په شيرزي لوبغالي کې مېلې اومشاعرې ته زمينه برابره کړه او مينه والو يې له ستونزو پرته حضور ور وړی و.
د نارنج ګل دوديزه مشاعره چې د جمعې له لمانځه وروسته پيل شوه،والي سليم خان کندوزي يې په پيل کې وويل: مشاعره ازاده بڼه لري او هر شاعر د خپل زړه غږ د شعر په ژبه له سانسور پرته وړاندې کولی شي.
نوموړي وويل: « غواړي د سانسور زنځيرونه مات کړي او ليکوالو او شاعرانو ته فرصت ورکړي،چې دولس غوښتنې د شعرپه ژبه ووايي .»
هغه له شاعرانو هم وغوښتل،چې داسې شعرونه وړاندې کړي،چې له ځانه سره د سولې پيغام ولري.
د اطلاعاتو او کلتور رئيس اورنګ صميم هم له شاعرانو وغوښتل،چې داسې شعرونه واوروي چې کوم شخص او قوم ته پکې سپکاوی نه وي شوی.
مشاعره د ليکوالې او شاعرې صفيه صديقي د شعر په اورولو پيل شوه او وروسته د هېواد له لر او بر سربېره له کوزې پښتونخوا رابلل شوو شاعرانو شعرونه واورول .
د شاعرانو په شعرونو کې د هېواد سره د مېنې او د سولې د ټينګښت پيغامونه نغښتي وو،چې د ګډونوالو له لوري په تودو ولولو بدرګه شول.
د نارنج ګل شاوخوا دوه پنځوسمې دودیزې مشاعرې پای د یو شمېر ګډونوالو له لورې په ملي اتڼ ترسره کولو سره پای ته ورسیده .
په ننګرهار کې د نارنج ګل مشاعره له شاوخوا پنځو لسيزو راهيسې نمانځل کېږي او نورو ولايتونو هم ترې رنګ اخيستی،چې اوس په يادو ولايتونوکې په بېلابېلو دوديزو نومونوسره يې نمانځنې ترسره کېږي.
د ننګرهار مطبوعاتي دفتر
د جلال آباد او نارنج ګل په یاد ـ ـ ـ ـ جلال آباده ، دزړه مراده ، اوسې آباده ؛؛؛ درباندې وياړم ، درپسې ژاړم ، له خدايه غواړم ؛؛؛ د خلکو پام شي ، وطن آرام شي ، دښمن ناکام شي ؛؛؛ نو نـنګرهاره ! ، مدام بهاره ، دګلو هاره ؛؛؛ ستا مسافر يم ، زوړ مهاجر يم ، پریشان خاطر يم ؛؛؛ دا مې دعا ده ، اوسې آباده ، جلال آباده ، جلال آباده !( ک ، ج ، شیرشاهیوال
سلام
ننګرهار که د جلال الدين اکبر د لاس نښه ډير ښايسته ښار دى. د ننګرهار ولس يو منور ولس دى چې ډير اوچت شاعران، ليکوالان،عالمان او په خاوره مين خلک يې په خپله لمنه کې روزلي دي.په ٢٠١١ کال کې زه له کابل نه د ننګرهار په لوري روان وم ماته د ماهيپر،وريښمن تنګي، نغلو سروبئ، سرخکان په زره پورې هغه سيمې دې چه هره برخه يې د سيلانيانو لپاره
منظرې لري خو کله چې د درونټې بند ته ورسيدم ښايست لانور هم ښايسته شو په هر حال کومه خبره چې زه ېې له خپل ولس سره شريکوم هغه داده چې ٤٠ کاله د پاچا اداره له دې تونل نه په کراتو تيره شوې، ورپسي د شهيد داودخان حکومت ، ورپسې سره انډيوالان چې ملک ېې په روسانو خرڅ کړى وه له هغه وروسته د هل او عقد مشر يا د کابل ښار تباه کوونکي چې پروفيسور ورته د شهادت لقب ورکړي او له هغه وروسته طالبانو له طالبانو ورورسته ستر مکار حامد کرزي چې اوس هم په تولو غونډو کې ځان ډير حق په جانب نيسي او د کابل هوايي ډګر عوض ددې چې د موسي شفيق او يا د وفې الله سميعي په نوم شوى واى دده په نوم ياديږي ټولو د تونل د چراغ مشکل ، سهولت نه دې پېژندلئ ډير لنډ تونل دي خو ډير تياره او هېڅ د نړى په کچه رڼا نه لري. او نه دمقاسې وړ دي موږ فکر کوو سليم خان کندوزي به ښه سړي وي خو د ننګرهار په شان ولايت ته نه .ښه به داوي چې د ننګرهار د عمراني کيدلو اوپرمختګ لپاره دغه مسوليت صديقي خور په غاړه واخلي چې اهليت او لياقت ېې لري او په تيره بيا د ننګرهار د بلبلانو ، ليکوالانو،ديني عالمانو، تاريخ پوهانو، منورينو او اوچتو رجالو عزت او اهميت به نورهم زيات شي